အိုင်ကီရာ သက်ရောက်မှု ( IKEA Effect )
“ကိုယ့်ကုန်ပစ္စည်းကို စားသုံးသူတွေ ပိုတန်ဖိုးထားစေချင်ရင် သူတို့လုပ်အားပေါင်းထဲ့ခိုင်းပါ။”
အိုင်ကီရာ (IKEA) ဆိုတာက ပရိဘောဂ ပစ္စည်းတွေကို ဖြုတ်လို့တပ်လို့ရအောင် လုပ်ပြီးရောင်းချတဲ့ကုမ္မဏီလုပ်ငန်းဖြစ်ပါတယ်။
တစ်ချိန်က ပရိဘောဂ ဆိုတာ ကြီးမားလေးလံပြီး ဝန်ကျယ်တာကြောင့် သယ်ယူပို့ဆောင်ရေးမှာ အင်မတန်မှ ခက်ခဲ့ပါတယ်။ IKEA ရဲ့ပဲ့ကိုင်ရှင် Ingvar Kamprad က သယ်ယူပို့ဆောင်ရေးလွယ်ကူအောင် စားပွဲခုံတွေ၊ ကုတင်တွေရဲ့ခြေထောက်တွေကို ဖြုတ်လွယ်တပ်လွယ်ဖြစ်အောင် ဒီဇိုင်းလုပ်ခဲ့ပြီး ဈေးကွက်ဖြန့် ချိရေးမှာ လွယ်ကူစေပြီး ကုန်ကျစားရိတ်သက်သာစေခဲ့ပါတယ်။
အစပိုင်းမှာ သယ်ယူပို့ဆောင်ရေးလွယ်ကူအောင်၊ ကုန်ကျစားရိတ်သက်သာအောင် ဆိုတဲ့ ရည်ရွယ်ချက်နဲ့လုပ်ဆောင်ခဲ့ပြီး နောက်ပိုင်းမှာ အခြားအံ့သြစရာကောင်းတဲ့အကြောင်းအရာတစ်ခုကို တွေ့ရှိခဲ့ပါတယ်။ အဲဒါကတော့ ဈေးကွက်မှာ ဝယ်ယူသူတွေက သူတို့ကိုယ်တိုင် တပ်ဆင်ထားတဲ့ ပရိဘောဂ ကို
ပိုတန်ဖိုးထားပြီး ဂုဏ်ယူတတ်ကြတယ်ဆိုတဲ့အချက်ပဲဖြစ်ပါတယ်။
အိမ်မှာ ပစ္စည်းတစ်ခုခုပျက်သွားလို့ မိမိကိုယ်တိုင် အောင်မြင်စွာပြင်ဆင်ပြီးစီးသွားတဲ့အခါ အောင်မြင်မှု တစ်ခုကို ခံစားရသလိုပါပဲ။ ငါကွ၊ ငါတယ်ဟုတ်ပါလား ဆိုတဲ့ မိမိကိုယ်ကို ကျေနပ်ဂုဏ်ယူမှုမျိုးခံစားဖူးကြမယ်ထင်ပါတယ်။
ဂုဏ်ယူမှု၊ တန်ဖိုးထားမှု၊ ယုံကြည်မှု
*************************
အကြောင်းအရာတစ်ခုကို မိမိကိုယ်တိုင်လုပ်လိုက်တဲ့အခါ၊ အဲဒီအကြောင်းအရာအတွက် .. ဂုဏ်ယူမိသလို၊ ကိုယ်လုပ်အားပါဝင်တဲ့အတွက် ပိုတန်ဖိုးထားမိပါတယ်။ ကိုယ်လုပ်တဲ့အကြောင်းအရာကို ယုံကြည်မှု ပိုပါတယ်။
ကိုယ်ကိုယ်တိုင်ရေးဆွဲထားတဲ့ ပန်းချီကားလေးတစ်ချပ်ဆိုတာ သူများတွေအတွက် အဖိုးမထိုက်ပေမယ့် ကိုယ့်အတွက်တော့ တန်ဖိုးကြီး အမှတ်တရ ဘဝအစိတ်အပိုင်းတစ်ခုပါပဲ။
ဖဲဝိုင်းမှာ ဖဲဝေတဲ့အခါ ၊ မိမိကိုယ်တိုင်ဝေရမှ ၊ချိုးရမှ ၊ ကိုယ့်အတွက် လပ်ကီးကောင်းတယ် ဆိုတဲ့ ယုံကြည်မှုမျိုးဖြစ်ပါတယ်
စီးပွားရေးလုပ်ငန်းတိုင်းရဲ့အိမ်မက်
************************
ကိုယ့်ရဲ့ထုတ်ကုန်ပစ္စည်းကို စားသုံးသူတွေ တန်ဖိုးထားမှု ၊ သုံးစွဲရတဲ့အတွက် ဂုဏ်ယူမှု၊ ကုန်ပစ္စည်းအပေါ်မှာ ယုံကြည်မှု ဆိုတာ စီးပွားရေးလုပ်ငန်းတိုင်းရဲ့အိမ်မက်ပါ။
အဲဒီလိုအချက်တွေ ပေါင်းစပ်ပေးနိုင်ဖို့ ကြိုးစားတဲ့အခါ …
အခုကျွန်တော် လို.တို.ရှင်း ပြောပြထားတဲ့ IKEA Effect အိုင်ကီရာ သက်ရောက်မှု ဆိုတဲ့ အကြောင်းအရာလေးတစ်ခုကို သတိရပြီး စမ်းကြည့်စေလိုပါတယ်။
“ကိုယ့်ကုန်ပစ္စည်းကို စားသုံးသူတွေ ပိုတန်ဖိုးထားစေချင်ရင် သူတို့လုပ်အားပေါင်းထဲ့ခိုင်းပါ။”
မာသင်
