စားသုံးသူ (၆) မျိုး

ရောင်းရငွေ ဆိုသည့် အကြောင်းအရာ သည် လုပ်ငန်းတိုင်း မဖြစ်မနေ အစဉ်အမြဲ တိုးတက်စေရန် ကြိုးစားအားထုတ်နေရသောအရာဖြစ်သည်။

ယနေ့ရောင်းရငွေ သည် မနက်ဖြန်အတွက် အရင်း ဖြစ်နိုင်သလို၊ ရောင်းရငွေ အတက်အကျသည် လုပ်ငန်းတစ်ခု ရေရှည်ရပ်တည်ရှင်သန်ဖို့အတွက် အားကိုးအားထားရာ အကြောင်းအရာတစ်ရပ်ဖြစ်သည်။

ရောင်းရငွေများလာခြင်းကို ရောင်းအားတက်သည် ပြောကြသည်။ ရောင်းရငွေနည်းသွားခြင်းကို ရောင်းအားကျသည်ဟု ပြောကြသည်။ ရောင်းအားအတက်အကျ ကို လုပ်ငန်းတိုင်းက နေ့စဉ် လစဉ် နှစ်စဉ် ဆန်းစစ်နေရပြီး ရောင်းအားများတက်လာအောင် အမြဲ ကြိုးစားအားထုတ်နေရသည်။

ရောင်းအားနှင့် တိုက်ရိုက်ပတ်သတ်နေသောအရာသည် စားသုံးသူ ဖောက်သည် Customer ပင် ဖြစ်သည်။
စားသုံးသူဖောက်သည်များလာလျင် ရောင်းအားတက်လာသည်။

စားသုံးသူများများရအောင်ရှာခြင်းသည် အရေးကြီးသည်မှန်သော်လည်း၊ ရှာထား၊ရထားတဲ့ စားသုံးသူဖောက်သည်များကို ထိန်းသိမ်းနိုင်ခြင်းသည် ပို၍အရေးကြီးသည်။ မဟုတ်လျင် အိတ်ပေါက်နှင့် ဖားကောက်သလိုပင်ဖြစ်မည်၊ များများတော့ရသည်၊ဘာမှမကျန် ဆိုသလို ဖြစ်နေတတ်သည်။

စားသုံးသူအသစ်ရအောင်လုပ်နိုင်ခြင်းသည် Customer အသစ်တစ်ယောက်ကို မွေးဖွားခြင်း နှင့်တူပြီး ၊ ရှိပြီးသားစားသုံးသူအဟောင်းကို ပြန်လည်ဝယ်ယူစေခြင်းသည် အသက်ပြန်သွင်းခြင်း နှင့်တူသည်။

လုပ်ငန်းတိုင်းတွင် စားသုံးသူဖောက်သည် Customer များသည် ပုံစံ (၆) မျိုးနှင့် ရှိနေကြသည်။
၁။ မွေးခါစ ဖောက်သည်
( Newly born Customer )

၂။ တက်ကြွရှင်သန်သော ဖောက်သည်
(Active Customer )

၃။ ရှင်သန်မှုနှေးကွေးလာသော ဖောက်သည်
( Less Active Customer )

၄။ ရှင်သန်မှုမရှိဆိတ်ငြိမ်သွားသော ဖောက်သည်
( Dormant Customer )

၅။ ပြန်လည်အသက်ဖုတ်သွင်းထားသော ဖောက်သည်
(Zombie Customer )

၆။ ပြန်လည်နိုးထတက်ကြွရွင်လန်းလာသော ဖောက်သည်
( Reactivated Customer )

လုပ်ငန်းအများစုသည် အသစ်ဝယ်ယူသော Customer အသစ်များကို ဦးစားပေးပြီးရှာနေကြသည်။ အသစ်သစ်သော စားသုံးသူများကို မွေးထုတ်ဖို့သာအားသန်ကြသည်။ ဆက်လျက်ရှင်သန်အောင်ပြုစုပျိုးထောင်ဖို့နှင့် မဝယ်တော့သော ရှိပြီးသား စားသုံးသူများကို ပြန်လည်အသက်သွင်းပြီး တက်ကြွရွင်လန်းအောင် လုပ်ဖို့စိတ်မရောက်ကြပေ။

ဥပမာအားဖြင့် ကလေးတွေ အများကြီး မွေးပြီး မပြုစုမစောင့်ရှောက်နိုင်သော မိဘနှင့် တူသည်။
အမှန်တော့ ကြီးပြင်းလာအောင်မွေးဖို့လိုသည်။
မဝယ်တော့လျင်လဲ ပြန်လည်အသက်သွင်းဖို့လိုသည်။
ပြန်လည်အသက်သွင်းခြင်း သည် အသစ်တစ်ယောက်မွေးခြင်း ထက် ကုန်ကျစားရိတ်သက်သာသည်။
ရှိပြီးသား Customer ကို ပြန်ဝယ်အောင်လုပ်သည့် မားကက်တင်း ကုန်ကျစားရိတ်သည် ၊ Newly born Customer အသစ်တစ်ယောက်မွေးဖွားဖို့အတွက် မားကက်တင်း ကုန်ကျစားရိတ်ထက် ပျှမ်းမျှအားဖြင့် (၇) ဆ သက်သာသည်ဟု ဈေးကွက်သုတေသနများက ဆိုသည်။ အတိအကျ (၇) ဆ မဟုတ်သည့်တိုင်အောင် သက်သာသည်ကတော့ သေချာသည်။

ဒါကြောင့် ..
စီးပွားရေးလုပ်ငန်းများကို လိုတိုရှင်း အကြံလေးတစ်ခု ပေးချင်ပါသည်။
များများလဲ မွေးပါ .. ။
မွေးပြီးသားတွေကိုလဲ ပြန်ကြည့်ကြပါ။
သေသွားတာတွေကိုလဲ အသက်ပြန်သွင်းပါ ခင်ဗျာ။ ။

မာသင်
စီးပွားရေးအကြံပေး